الدكتورة : ابتسام الوكيل
بمناسبة اليوم العالمى للمرأه ...كل سنه واحنا نون النسوه طيبين....
واحنا طيبين بس خلينا فاكرين .....
_ فى تحرش بقوانين وعقوبات غير رادعه مع ان مصر رقم 2 على العالم فى مشكلة
التحرش ...ما شاء الله نتحسد ......
_ فى قوانين أحوال شخصيه لا زالت بها الكثير من الظلم للمرأه فمثلا تضطر
أنها تلجأ للخلع وتتنازل عن كل حقوقها بدلا من الطلاق اللى بيضيع عمرها فى المحاكم
!
_ فى قوانين عمل فى القطاع الخاص تهدر حق المراه فى انها تعمل فىمكانها
الصح وفى نفس الوقت تراعى بيتها وأولادها
_ فى مجتمع ذكورى بطبعه ( ده غير انه متدين بطبعه ) مطلع عينها
_ فى حقد على المرأه العامله الناجحه بشكل محبط
_ فى ضغط عليها من كل جهه كنوع من العقاب لها على تحملها المسئوليه فى
شكل انها لازم تثبت للجميع انها ادها وأدود
_ فى رجل فى حياتها ..الزوج او الأب أو الأخ أو كلهم ( وده لازم يكون
موجود علشان باقى المجتمع يحترم نفسه وما يتعرضلهاش بسوء ) والرجل ده اكبر مهامه انه
يسلط الضوء على عيوبها ونقط ضعفها ....( وبينسى يبص فى المرايا )
_ فى نفس الأب أو الأخ أو الزوج اللى بينكر عليها حقها فى ممارستها لهواياتها
المفضله او انها يبقى ليها وقتها الخاص بيها واللى هو نفسه بينكر عليها بعد كده انها
نكديه و افقها ضيق وضغوط الحياه مأثره عليها جدااااا
_ فى أم من حبها و خوفها عليها وعلى ولادها عاوزاها تبقى نسخه منها فى
نفسها وفى بيتها وفى تربيتها لأولادها ...فى معاملة زوجها لأ :)
_ فى مجتمع استهلاكى مخليها عامله زى العروسه الماريونيت والحق مش عليه
بصراحه ... الحق عليها هى علشان بتنساق ورا المجتمع ده
_ فى كمية مسلسلات وافلام المفروض انها اجتماعيه لكنها نكديه وبردو الحق
على نون النسوه انها بتستمع للأفلام ولمسلسلات دى
_ فى أبناء نسيوا الآباء زى ما الآباء نسيوهم بالتأكيد وبقت ماما هى ماما
وبابا وأنور وجدى وهى السبب فى سقوط الأندلس طبعا
_ فى المرأه اللى مش بترحم نفسها ولا بترحم أختها وتحاول تخفف الأعباء
اللى عليها وعلى بنات جنسها أما بالنميمه أو الغيره أو السخريه أو انها تترك نفسها
فريسه للملل والجهل والتليفزيون ....أو يبقى كل همها انها ترضى الناس على حساب نفسها
طبعا ... المهم شكلها ايه ؟ و الناس هيقولوا ايه عنها ؟
أحب أقولها ( ارضاء الناس غايه لا تدرك ) ...خليكى فى حالك انتى وبس
!!
_ فى هوايات بتموت وطموحات بتتقتل وتتدفن .... ولا عزاء للسيدات
دى مش كل حاجه واحب تفكرونى باللى نسيته ...لكن خلينا فاكرين
المهم ان اليوم ده عالمى والعالم بيحتفل بيه من سنين وللأسف معظمها مشاكل
عامه و بعضها خاص بالشرق فقط ... و خلينا فاكرين انه لا حلول للأسف....
مع تمنياتى بحياه تكونى انتى راضيه عنها قبل ما تحاولى ترضى الناس عنك
سيبك انتى
...كل سنه واحنا طيبين ....#ابتسام_الوكيل
ليست هناك تعليقات:
إرسال تعليق